"DATU DAYUHAN WAN DATU INTINGAN VS DATU SIMALI’ING"
(ASAL MUASAL GUNUNG KAPALA PITU)Oleh: Datu Panglima Alai
Kesah nangini kesah lagenda asal muasal gunung kapala pitu..damini kesahnya:
Di Pagunungan Maratus dahulu kala parnah hidup badua badangsanak, si Ayuh atawa Dayuhan wan si Intingan atawa Bambang Basiwara. Bubuhan kakulaan sabarataan pasti hudah tau nang badua badangsanak nitu padatuan kita barataan luku. Datu Ayuh wan Datu Intingan nangini akur bangat badangsanakan, ka mana-mana haja badua tarus, kada parnah bacakut wan kadua-duanya ne sama baisi kajian masing-masing.
Sidin badua badangsanak nangini bijaksana bangat munnya maatur hidup urang-urang kampung nang ba’utu di Pagunungan Maratus. Kada hiran munnya badua badangsanak nangini dihurmati wan disagani siapa haja,sampai-sampai sidin badua nitu dihurmati ulih bubuhan Dayak nang ba’utu di borneo bagian timur, tangah wan barat.
Salain Datu Ayuh wan Datu Intingan nang suah hidup di Pagunungan Maratus nitu,ada jua nang suah hidup di sana,ngaran sidin Datu Sumali’ing. Datu nang sekong nangini kalakuannya kabalikan dari Datu Ayuh wan Datu Intingan. Bubuhan nang ba’utu di Pagunungan Maratus takutan bangat wan Datu Sumali’ing nangini. Sidin baisi kajian nang ngalih dialahakan. Sidin kada tadas bila ditimpas,tahan ditimbak,nang paling harat kajian sidin nitu siapa haja nang kana ludah sidin langsung barubah jadi batu. Banyak hudah nang jd kurban datu sekong ni,sampai-sampai binatang gen byk jd batu,kd kawa sarek sadikit lalu haja sidin ne maludahi,”cuuuuuuhh…” labaram munnya kana situsaini tu pang jd batu.
Lantaran Datu Sumali’ing nangini byk baisi kajian wan datakutani urg,lalu ha sidin handak manguasai Pagunungan Maratus. Habar sidin nang handak manguasai Pagunungan Maratus tadangar lih Datu Ayuh wan Datu Intingan. Lalu ae badua badangsanak nangini barunding.
“ Intingan,ujar habar si sumali’ing handak manguasai Pagunungan Maratus luku” jar Datu Ayuh bapandir wan Datu Intingan.
“diaku mandangarae habar nitu,munnya sumali’ing manguasai Pagunungan ni ti, labaram munnya inya sarek diludahinya barataan anak cucu kita jadi batu barataannam” ujar Datu Intingan.
Lalu Datu Ayuh pulang nang bapandir, “munnya kaya itu,kita lawan haja sumali’ing nitu dari pada anak cucu kita jadi batu” ujar Datu Ayuh sambil maambil sumpitan dimuhara lawang.
“hadang dulu,sumali’ing nitu harat jua jd kita musti mancari kalamahan inya” Ujar Datu Intingan maingatakan dangsanaknya.
Limbahnya ba’atur,lalu ae badua badangsanak nangini badadas mancari Datu Sumali’ing.
Kasana-kamari,kahulu-kahilir Datu Ayuh wan Datu Intingan mancarii Datu Sumali’ing tp tatap haja kada tadapat..Lantaran kalapahan,sidin nang badua nitu bamandak sapandang,baduduk di atas batu nang ganal wan tinggi sambil baunjur batis. Kada sa’apa sidin badua nitu baduduk,di subarang gunung Datu Ayuh wan Datu Intingan malihat Datu Sumali’ing bajalan sambil ma’anggung 6 ekong payau. Rupanya Datu sekong nangini imbah bagarit baulih 6 ekong payau. Tumatan subarang gunung, Datu Ayuh wan Datu Intingan masih mahintipakan Datu Sumali’ing nang bamandak sambil manggarak-garakan awak nang kalapahan imbah ma’anggung 6 ekong payau td..Pinanya datu Sumali’ing ni ti handak barabah wan guring lantaran kalapahan tadi.
Datu Ayuh wan Datu Intingan nang lagi mahintipakan basiap-siap handak manyumpit Datu Sumali’ing tumatan subarang gunung. Baluman lagi manyumpit, datu badua badangsanak nangini takajut lantaran ada suara gaib nang babisik ditalinga buhannya. Ujar suara gaib nitu babisik, “Munnya buhan ikam handak malahakan Sumali’ing nitu,buhan ikam sumpit haja karakungannya”.
Limbah suara gaib nitu babisik, hancapae Datu Ayuh wan Datu Intingan basip-siap handak manyumpit. Kabulujuran Datu Sumali’ing paharatan manguap, badadas datu badua badangsanak nitu manyumpit karakungan Datu Sumali’ing. Pphuuuuuuu…pphuuuuuuuu..!!! tumatan subarang gunung anak sumpitan Datu Ayuh wan Datu Intingan tarabang liwar hancap bangat. Kkhaaapp..kkhaappp..!! dua buku anak sumpitan tatajak di dalam karakungan Datu Sumali’ing nang paharatan manguap nitu..kada lawas limbah nitu tadangar bunyi patir sing nyaringan wan langit bakajutan kadap. Kada sa’apa limbah nitu langit bakajutan tarang pulang. Datu Ayuh wan Datu Intingan nang masih di subarang gunung liwar takajut malihat Datu Sumali’ing wan 6 ekong Payau nitu barubah manjadi 7 buah gugundukan bukit. Lalu 7 buah gugundukan bukit nitu dingarani Gunung Kapala Pitu, sabuting kapala Datu Sumali’ing, 6-nya lagi kapala Payau. Wahini gunung nitu masih ada, bila balalah ka kampung Batu Parahu kawa malihatinya.
Damintu kesahnya..ampun maaf bila ada kakurangannya wan labihnya.
* Kesah nangitu, dikesahakan lih Dalimun (Pambakal Batu Parahu)
